الجامعات و الشباب الجاهلين و المعاكسات!!

االسلام عليكم

مشكورة اختى سارة على طرحك لهذا الموضوع الشيق والذى يحتاج الى نقاشات وحل فورى ولاكن بصدق مهما تنادى مهما تديري هذى طبيعة الحياة انتى شوفى حتى فى برامج يحاورو فيه فى المواضيع الى زى هذى مش بس عندنا فى ليبيا فى العالم العربى كله هم يقولو امر طبيعى المعاكسات ولاكن قد يؤدن الى تحرش وهذا الشيئ الى يسير عند تطور المعاكسات يعنى بعد يشعر انه البنت منسجمة مع كلامه وهكى يتماده ويقعد يفكر فى حاجات تانية وينتظر الفرصة المناسبة وانا منقصدش كل البنات يعنى يكونن منسجمات مع المعاكسات وبعدين المرأة تحب تسمع كلام جميل بطبعها يعنى بس زى كلام الشباب الى عندنا هنا يعنى كلام بذيء وهكى
وبعدين فيه شرطة داخل الجامعة يا اختى اى حد يسكنلك كلمى شرطى يكروه ولو متبيش مشاكل لهلك يعنى متبيش يسمعوها ديريله تعاهد ومعاش يقدر يتعدى حتى يخطم جنبك

اخر الموضوع اختى انا نحكى فى واقعنا الى عايشين فيه لا عميد لا ادارة لا شى بجد الوقت هذا يخوف بجد حتى الى يحط زوجته او اخته او بنته يقعد خايف كل مره سامعين قتل وكلام زى هكى فى جامعة

اخر كلام كل بنت تدير حشاكم كلب ولف ولا سلاح جو وادى الذئاب لانه حياتنا شبيها بى قصة المسلسل هذا حاليا

عموما مشكورين خوتى بارك الله فيكم وان شاء الله نسمعو اخبار جيدة عنك اختى سارة

خويا الشهاب بالنسبة للتربية والأخلاق هذا للأسف شي نسمعوا بيه في المسلسلات بس
والشباب اللي انت تشوفوا فيهم كل واحد داير روحه قمة في الأدب والأخلاق والتدين
وتلقاهم ماليين نقالاتهم بالأدعية والأذكار ويفتوا ويناقشوا في المسائل الدينية
ولما يجي التنفيذ..............
يعني تلقاهم اول وحدين مصبيين يعاكسوا
ولما تجيهم اول فرصة للسرقة والتلاعب تلقاهم اول وحدين (زي ما صار في سرقة الشقق)
والحل الوحيد للإنضباط هو فرض القوانين ومعاقبة المخالفين وهذا اللي مش حاصل عندنا كما نعلم
لذلك نحن خذينا عالفوضى في كل شي
وبالنسبة للجامعة العميد اكيد خايف على منصبه فلما تقدم ضده شكوى او تقام مضاهره في الجامعة
اكيد حيخاف ويحقق طلبات الطلبة

لذلك الحل في هذا الموضوع هو كالتالي:
اول شي البنات يقدمن طلب للعميد عن طريق السكرتير بتاعه
وإذا ما صار شي تقدم الشكوى إلى الإدارة العامة في بنغازي وأي حد يقدر يقدم الطلب بكل سهولة أو عن طريق الدخول لموقع جامعة قاريونس وتقديم الشكوى وهي ان العميد ما دارش حل في هذا الموضوع (هذا في حالة اذا غم عالطلب الأول) وصدقوووني ان العميد في هالحالة حيخاف وينظر للموضوع
لكن انشالله ما توصلش الأمور لهذه الدرجة ويستجيب العميد للطلب من اول مرة ويدير حل للموضوع
وشي اخر بالنسبة للبنات انتمنى ما يسكتنش عالموضوع ويخافن، لأنهن لو سكتن الموضوع حيزيد اكثر واكثر ويكونن هن الضحية
وشي اخير يالشهاب الغلط مش بس من البنات اللي يلبسن في لبس ملفت
لأن الشباب المرضى ما يسيبوش وحدة في حالها سواء كانت لابسة لبس ملفت او حتى اذا كانت متخمرة ومتغطية كلها
والشي هذا مش بس في الجامعة ولكن في كل مكان عندنا في المرج...

اقتباس :: انت عليك انك اتديري عريضة او طلب وتكتبي هذه المشكلة وتجمعي تواقيع بنات الجامعة
وهذا محتاج مجهود منك وجراة
وتسلمي الورقة لعميد الجامعة شخصياً

عميد الجامعة لاايحل لايربط,مافي يده شي,ومش حيقدر ايدير أى حل.

لان الجامعة شكلا هي تتبع الدولة والكلام هذا.

لكن في الواقع معروف من هم الذين حقيقة يسيّرون الجامعة,كيف ماايقولو المصريين"البلطجية".

المهم أنه حل المشكلة هذى لايمكن يكون من طرف واحد.

بمعني لايمكن يكون الحل من طرف الجامعة فقط,أو الطالب فقط,أو الأسرة فقط.

لازم من اجتماع جميع الأطراف,لأنها مشكلة متعددة الأسباب.

من ناحية الأسرة متابعة أبناءهم وبناتهم,وتربيتهم(التربية مش أكل وشرب ودبش فقط).

من ناحية الجامعة يجب فرض النظام والقانون,وإبعاد العصابة اللي تدير الجامعة وتسير فيها.

وإلزام الطلبة باللوائح والقوانين المتبعة في هذا.

من ناحية الطلبة هو أن يعرف كل واحد أنه بتصرفاته يدل على أصله اللي طالع منه.

وفي نقطة مهمة (بالبنات) هو اللباس.

يعني أنا في الجامعة انشوف في بنات تلبس في حاجات مش عارف من وين طالعة بس!!.

وين باتها وخوتها وأمها؟؟؟.

بجد وكأنها تبي الشباب ايعاكسها.

مش كل البنات بس الواقع أنها نسبة كبيرة جدا.

طبعا في حل أسهل وايريحنا من الكلام هذا كله وهو:

"جامعة للبنات بس"و"جامعة للشباب بس"

وهكي تنتهي القصة أو الجزء الأكبر منها.

اول شي نشكرك يا سارة على طرحك للموضوع وانا بصراحة انفضل نوعية هذه المواضيع في المنتدى واللي تسلط الضوء على بعض الظواهر اللي يعاني منها مجتمعنا
لأن من احسن الطرق لمعالجة الغلط هي الإعتراف بالغلط....
وبالنسبة لموضوعك انا نحط اللوم اولا واخيرا على مسؤلين الجامعة، لأن اي مكان لما ما تحطش قانون حيسير انفلات..
فمن الطبيعي لما شباب يجو ويلقو المجال مفتوح اكيد حيجو ويزيدوا كل يوم ويتفننوا في انواع المعاكسات
وطبعا الأمن هم (عبدو المأمور) يعني ما يشتغلوش إلا بأوامر من اللي وظفوهم
والحال هذا مش بس في الجامعة يعني انت عطيتي صورة مصغرة لمجتمعنا في هذه الاحداث
فنحن لأن ما فيش رقابة وما فيش قوانين فتقريبا الجميع عايشين بانفلات وغجرية
وحتي الشرطة ورجال الأمن من المعروف انهم يحموا في اقاربهم ومعارفهم نفس ما قلتي انت

لذلك نقولك ان فيه حل واحد ممكن اتديريه انت وكل البنات اللي يعانن من هذه الظاهرة
انت عليك انك اتديري عريضة او طلب وتكتبي هذه المشكلة وتجمعي تواقيع بنات الجامعة
وهذا محتاج مجهود منك وجراة
وتسلمي الورقة لعميد الجامعة شخصياً
وتقدري تبعثي رسالتك حتى لإذاعة المرج او لبعض المشايخ (عسى ولعل) ينصحوا هؤلاء الشباب في خطب الجمعة...
وأخيرا نتمنى منك مزيد من مثل هذه الموضوعات
والمزيد من المشاركات معنا في المنتدى
Smile

بصراحه انا جيت نبي نكتب الموضوع احترت وين انحطه لانه انا من اول ما دخلت الجامعه وانا انقول ليش كيف وشنو السبب ؟
انا ندرس في جامعة المرج و هذه ثاني سنه ليا غادي وانا لاحظت في تزايد بكل في نسبة الشباب يلي يجو غادي و مايديرو في شي يعني لا يقرو فيها ولا حاجه
و انا بصراحه بديت انحس انه الجامعات في ليبيا و في مدينة المرج بالذات مكان ترفيه زي نظام المنتزهات بالضبط ...
وانا من اول مانخش للجامعه من عند الباب و الشباب يبدو يضايقو في البنات يلي دايره كذا يلي لابسه كذا و كلام فاضي و نصفهم شباب جاهلين وبديت حتى نكره انجيها الجامعه خوفا من المعاكسات و المضايقه و الاحراج و التعليقات السخيفه حتى انه القسم يلي نقرا فيه مجرد مانخشله نبدا نرتعد من الخوف من الحاجات هذين و حتى انه من اول مانطلع من قاعة المحاضره نفس الشي كلام فاضي و سخيف من شباب ماعندهم مايديرو لا شغل و لا مشغله , انا نبي نعرف وين هلهم وين اولياء امورهم ليش مايمنعوش الشي هذا !!!
ويجو للجامعه من دون سبب اذا كانو يحبو الجامعه بالدرجه هذه يبقى ليش مايجو ويقرو فيها عشان عالاقل يقعد عندهم دافع و سبب ..
وحتى و في امن الامن شر منهم وحتى لو تشكيلهم من اي حد يضايق فيك يقولولك باهي و يمشوك على وجك ويقولولك هذا صاحب و في النهايه بكل مايديرولكش حل و تنكتب عليك انك شكيت للامن و تشوه سمعة البنت لانها حكت مع رجاله ... باهي اذا مااقدروش يمنعو الشباب يخشو للجامعه عالاقل يمنعو المجانين و المغول يلي يخشو غادي و يضايقو في البنات بطريقه واضحه ...
وفي حتى رجاله كبار و متزوجين يجو ويعاكسو وكأنه ماعندهمش خوات و لا قريبات
ياريت تساعدوني محاربة الآفه هذه و معرفة اسبابها و اي واحد في المنتدى عنده اصحاب ياريت ينصحهم و يوجههم ويوريهم انه هذا حرااااااااام .
وانا ندعي للشباب الليبي كله وانه ربي يصلحهم و يطور من حالهم يلي قاعد من السئ للأسوء
مشكووووووووووور
وان شاء الله يعجبكم الموضوع المطروح ...