غناوي الفقد

اللي فاقد يا ناس غلاه ايجيني نبكي نا وياه
فرقاهم خلاني هكي كل عزاء عليه انتكي
يوم فراقه ياما جضت نين صوابع ديها عضت
جضت ما جضت ما جضت صار خطا لولاف وفضت
يوم فراقه الناس التمت لكن فيه اللي متشمت
يوم فراقه درنا ليلة بكينا الواعر في العيلة
يوم فراق اللي غاليته سابع جار اللي بكيته
واجعاتني وجوه ارحلن لا لهن مثيل ولا بن ينتسن
فراق عزيز من مولاي مكتوب غير عيني جاهلة
يوم فراق عزيز انعاني ذاهب جابوني جيراني
عزيز فراقه مر او شين غير الله غالب ياعين
يوم فراقه شينك ليلة عبنا حتى في والدينا
يوم فراقه شانت عيني حتى ع الضيف اللي ايجيني
فراقه كم عام احملتيه عليش ابكاك اليوم عليه
دونك يا مولاي انصفلي الغالي غاب وهو حالفلي
امرار شربته فوق امرار فراق عزيز وخلو الدار
تقول واحية الفراق لهل زمان عيني امرقرقة
يوم فراقه العبرة تمت تخنق نين عربها لمت
يوم فراقي نا ومنايا عزايا تعقب عزايا
فراقه ساهل تحسابيه سعتا من قبل اتقيسيه
حتى الشيخ بكى في آذانه وين سمع بفراق امنانا
ايش اوعر منها يا لولاف فراق وكل نهار اصداف
الخاطر كل نهار فراق ونا بيدي بالي ضياق
فاهق شين عزيز غيابه غير المكتوب رضينابه
ديما مبخوتلنا فلي فاهق شين وراه ايخلي
لو كان اللي فارقناهم ينجابو ببكا جبناهم
من فرقاه وهن يشالن عام ورا عام ومازالن
فرقاهم ياعين حسايف نبعد يوم ويوم انرايف
عزيز وفارق يا لنظار تباكن واللي خايف صار
يوم فراق عزيز اذهبنا هو شرق ونحن غربنا
لو كان قايسه جضيت فرقاه عزيز يلي لمتني