مسكونة صوب غوالينا .. كل نهار ابراي اتجينا

النار

اللي ننشده ع النار أيقول في ياما لذعت

اللي نشكيله م النيران ايقول كلتني لي زمان

أبروحه مشا للنار يستاهل الخاطر لذعهم

تهنا يا القديم علي النار خذت غايتا في

تصليب جابها ع الكبد خبير يا علم نار الغلا

النار قايله للعقل كان صار ياس لولاف ناخذك

بلا قشوشه للنار اتشيط نوحلوا في ردمها

خلاني عزيز رماد امغير فيش يا نار والعه



النوم


كذاب يا منام الليل اتجيب في ناس طال ياسهم

لو كان غير أتغفي تطييب نوم ماهي اموالفه

ديما يا العزيز سريبك قبل النوم العين اتجيبك

وين أيهف عزيز عليهن كيف ايريد النوم ايجيهن

وان النوم عزيز ايجيني مايمشي نين ايواعيني

ان فيه يا القديم برمت النوم عند عيني ما اسمحه

العقل ما ينام الليل سطير جرح لولاف سمره

غلاهم ابقي للعقل جنين وين نام وسده

لولا سطير الجرح راه النوم يا عين جايك

اتقول خلقهن ربي توم ان غاب عزيز ايغيب النوم

قولو للمرهون تهنا هو والنوم ايسنا منا

النوم ان جو فيه مراهين ايش اسمح منا عند العين

راقد وجاك النوم كذاب مو غلانا جارحك

ازعما يا نجوم الليل عزيز راه في نومه هني

بعد اسمورها بغلاك العين يا علم نامت بهدو

احلمت يا عزيز منام تمنيت الليل ما كمل

العين ما تنام الليل من يالا غلا زاري بها

عزيز وقت نوم العين تبقى امعايا ناره تدقل

لو كان يا منام الليل تبقى رسيل بيني وبينهم

سريب ناس كانوا صوب البارح منامي جابهم

خيالات ياس عزيز للعين وين نامت أيجن

لاغفن بدري لا تالي عدا الليل بكا ع الغالي

العين وقت نوم الناس لازم لها نوع تجبده

مطاول بعد لولاف فجرك بعيد يا ليل خاطري



الياس



ننسوا فيه يوم ابيوم عزيز نين ياساته مضن

يوم الميته قبري احذا قبرا ايجي ياريته

انكان في الحياة ما صار

نا ما لي عليك ملام ويا ياس ليش اتزورني

تباعد عليك عزيز أجبال ياس دونه ظلمن

عزيز من دناه ايست وما أنريد فيت طاريه سادني

درت غلا و أوخذ قدامي كلا من تعكيس أيامي

درت غلا و أوخذ م الساعة في جرت لاخرين اداعا

نا والعين جريت عليهم ما صارت قسمية فيهم

لقسام واخذات عزيز لغيري ونا عوني رقد

عزيز بندرو له ناس غروبه مشا في طوعهم

انت يا عين وراك تبيع الصوب اللي اديريه أيضيع

صنم شكيت له م الياس جبر ابخاطري وقال يقسموا

شدي عزايمك يا عين يفنى العمر يا بال الغلا

اندير الغلا وايضيع ملطوط فيه بختي نا اللي

اتقول راضعين امعاه علقت الياس فينا طولت

الياس في فراش الموت كلم ظناه وصاهم علي

البكا

حتى لو بكيتي عمر علي قديم مو عاد جايك

عزيز ما ايروف عليك احذاه لو اتموتي م البكا

لا يوم لا شهر لا عام لنا أسنين في أسنين نذرفوا

بلاش رقرقة يا عين عزيز كان مقسوملك ايجي

الخاطر لو كان أيشاكيك بعزمك هاذاك أيبكيك

تبكن واللا ما اتباكن هك وهك عزيز رخاكن

في للوهام مناحه دارت لاعاد اتصير ولا صارت

تضايق ان كان اسكتت وان هي بكت مي باده

بكوها عقاب الليل لاهناك دوج لا وين نلتجي

تنويعك يا عين ايضرك ع المرهون ابكي في سرك

الخطا

اللي هلبه يوم خطاك طويل عمر ثاريت خاطري

يوم خطا لولاف انعاني ذاهب جابوني جيراني

يوم خطاهم خفت انغفي نصبح لمباكر متوفي

دونك يا مولاي انصفلي خان الصوب وهو حالفلي

يا عيني خليهم عنك صار خطا منهم مو منك

اعشمي في عزيز ايبان برهاني قوي غير ع المهل

الموت كاينه واتكون خطاك هو اللي واعر علي

جرحي وين لمستا دمم قيسا م لولاف امسمم

العقل ما ينام الليل سطير جرح لولاف سمره





العقل

كبيره عليه العقل تجفاه دار ويعاود لها

نحلف والناس اتزكيني راك بلا عقل امخليني

العقل في بلاد جهال ان دار الغلا ياذوه يا علم

انكلا العقل عند لولاف وانكلا العين يالاي سايلة

ملامهم عليه كبير العقل كان دزوا له ايجي

العقل ما ينام الليل سطير جرح لولاف سمره

اعزاز خلفوا في العقل تنهيده علي قيس النفس



الجديد والقديم

غلا جديد توا بان نساني امهايات لولي

مازلت يا القديم وراك الوقت ما نهاني ع الغلا

وراي نلتفت ما زلت هيالي اقدم لاحقيني

جديد انديره ننسى لولي نشقى بغية غيره

ما عندي عليها

عزمي شديد وكل شي انديره ننسى القديم والجديد وغيره

الغلا

غلاك امخليني بكاي امرايف حتى وانت احذاي

غلاهم عقار اجدود ايموتن ولافيه سلمن

طاسة اصحاب الصوب مليانة غلا نين بددت

انت سبايبه يا عين غلا عزيز لولاك ما رسم

تخميم ورجا وسمور غلا عزيز جا كيدا علي

منور ايهم

جميل جدا تقبل مروري بكل تقدير[code]

شكرا مرجاويه
شكرا بشرى

مروركن اثرى مشاركتى واسف جدا للتأخر فى الرد عليكن

ولكن اجمل تحياتى